Anilkumar Rathwa (Sameer) 31 Mar 2026 ग़ज़ल समाजिक "નિષ્ઠાની કસોટી" 3629 0 Gujarati :: ગુજરાતી

શરણમાં ઈશ્વરની ગયા તો પણ શું થયું?
સ્વજન સાથે જો છલ કર્યું તો પણ શું થયું?

​દગો દઈને તમે જીતી ગયા આખું જગત,
પણ અંતર જો મેલું રહ્યું તો પણ શું થયું?

​વફાદારીની વ્યાખ્યામાં કુંભકર્ણ અમર થયો,
વિભીષણ થઈને જીવ્યા તો પણ શું થયું?

​મહેલો મળ્યા ને રાજગાદી પણ મળી ગઈ,
પણ ડાઘ જો માથે રહ્યો તો પણ શું થયું?

​'સમીર' જેણે ઉંબરો પોતાનો જ બાળી નાખ્યો,
પછી દુનિયામાં નામ થયું તો પણ શું થયું?